about us - hodinka.org

Об обществі

Az egyesületről

Abot Us

Вседержавноє Общество Русинської Интелиґенції
им. А. Годинкы

было орґанізовано 30 новембра 2002 рока
(зареґістровано 19 марта 2003 рока)

Основателями ВОРИАГ были:

проф. Др. А. Лявинец, проф. Др. И. Удварі,
Др. Л. Годинка, Др. А. Фединец, Др. М. Лявинец,
Др. Я. Сабов, Др. С. Лявинец, Др. К. Пірідї,
Т. Боніславськый, В. Гіріц, А. Зомборі, Й. Стрінська.

Председов ВОРИАГ быв выбраний проф. Др. А. Лявинец, заступником Др. А. Фединец, онук академіка
Др. Л. Годинка быв выбраний почетним президентом Общества.

Цілї ВОРИАГ:

• изглядовати духовно-інтелектуалноє наслїдіє имодателя академіка А. Годинкы, найти и позберати його рукописні матеріалы и їх опубліковати
  

• сохраняти и сокотити русинськый ідентитет у області културы, изглядовати общі коренї мадярсько-русинської исторії и културы
  

• сохраняти традиції и духовноє налїдіє Русинув, жыючих як у нашуй державі, так и за гатарами
  

• орґанізовати педаґоґічноє и лекторськоє ошколованя
  

• проводити научні конференції , выставкы, концерти
  

• подпоровати научну діятелность Русинув Отцюзнини и за гатарами
  

• основати русинськый научний изглядователскый центр, етноґрафічний музей и бібліотеку
  

• выдавати и роспространяти каждуй рік КалендарАлманах
  

• выдавати учебні пособія, книжкы, філмы
  

 Робота Общества проводила ся у секціях: лінґвістичнуй, літературнуй, медичнуй, историчнуй, педаґоґічнуй, културолоґічнуй. За 11 років ВОРИАГ систематично провело велику роботу слїдуючі поставленим цілям. По каждорічному плану в цілях изглядованя и пропагованя наслїдія имодателя акдеміка Антонія Годинкы Обществом были орґанізовані научні конференції, у котрых приняли участь научникы не лем институції Мадярщины, а и другых держав: Словакії, Украйины, Полші, Сербії.  У конференціях 2004 – 2010 активно   участвовали  

проф. Др. И. Удварі, Др. Й. Ботлік,
др. А. Штумпф-Бенедек, проф. Др. А. Золтан,
проф. Др. А. Лявинец, доц. А. Капраль (Мадярщина),
проф. Др. Л. Гараксим, доц. др. В. Хома (Словакія),
М. Алмаші, Д. Поп, В. Падяк (Украйина).

Было проведено 7 конференцій . Матеріалы конференції до 2010 рока публіковали ся у часописі Русинськый Світ, выдавателем котрого было Вседержавноє   Меншиновоє  Самосправованя    (ВРМС) и ВОРИАГ, а    редакторами    до  2010 рока -  Др. М. Лявинец, Др. С. Лявинец.

Дуже памнятним было сяткованя 140-рочя из дня рожденія акадкміка, котроє было проведено у Будапештї и у Пейчі (2004.02.06 – 2004. 02.08). У Пейчі была установлена памнятна табла на стінї Пейчської Універзіты, де А. Годинка быв єден час ректором. У день сяткованя памняти А. Годинкы торжественно вручала ся премія им. А. Годинкы, котру учредили ВРМС и ВОРИАГ. Из 2004 рока лавреатами стали 56 чоловік, котрі зробыли вклад у сохраненя націоналного ідентитета, вїры, розвой културы и языка Русинув. ВОРИАГ реґулярно выдає Русинськый Календарь Алманах, котрый выходить по ініціативі Русинського Самосправованя VIII. района Будапешта при подпорованю ВРМС, СРМС, Русинськых Самосправовань Будапешта и Самосправованьмногых поселень Мадярщины. Редакторами сёго выданя є проф. Др. А. Лявинец, Др. М. Лявинец и Др. С. Лявинец, художественим редактором А. Манайло. Дописовачами Календаря-Алманаха є літераторы из разных держав.

 Окрем того, ВОРИАГ были подпоровані и другы выданя: музыкалний албом «Вручаніє», «Русинськый букварь про школашув Мадярщины», «Вызнамні поставы русинської исторії, літературы и културы», художествений албом А. Фединця и др. Общество приняло учатіє у збераню матеріалув діла русинської бібліотекы и выставочного зала, у орґанізації чиселних выставок русинськых художникув. Памнятними были выставкы А. Фединця, родины Манайло, родины Медвецькых, А. Бровдія, И. Фірцак и др. Треба уповїсти про роботу медицинської секції, членами котрої были орґанізовані памнятні конференції посвячені знамому хірурґу А. Фединцю (110 и 115 р. из дня рожденія), збераня матеріалув про знамых русинськых докторув. По ініціативі женського Клубу «Рускыня» были позберані рецепти русинської кухнї, котрі выйшли у книжку «Рецепти русинськых ґаздынь Мадярщины». Єдным из достиженій роботы Общества є обновленя могылы академіка А. Годинкы проведеноє совмісно из родинов академіка, ВРМС и СРМС у 2010 році.

Представителі орґанізації втупили у контакт из онуком А. Годинкы, Др. Ласловом Годинков, котрый не лем поддержав ідею, а й подпоровав фінансово и дав писемний дозвол на установленя памнятника від имены родины. День 16 фебруара 2010 рока войшов у исторію русинської сполочности Мадярщины. Памнятник открыв онук академіка Др. Ласло Годинка. ВОРИАГ было ініціатором многых благотворителних концертув, літературно-музыкалних вечерув, на котрых постоянними учасниками быв струнний квартет им. А. Годинкы, орґанізований Т. Боніславськым. Вседержавноє Общество Русинської Интелиґенції им. А. Годинкы тїсно сполупрацує из многыми Русинськими Самосправованями Мадярщины , котрі принимають    активноє участіє у совмісних акціях.

Др. М. Лявинец